Каталониянинг “Барселона” клуби ҳужумчиси Роберт Левандовски ўз фаолиятини қаерда давом эттириши борасидаги саволларга жавоб берди. Бу ҳақда полшалик форвард Sky Sports нашрига берган интервьюсида маълум қилган.

37 ёшли футболчининг таъкидлашича, у келажаги борасида якуний тўхтамга келиш учун ўзига уч ой вақт берган:

“Келажакда нима қилишни хоҳлашимни ҳал қилиш учун ўзимга тахминан уч ой вақт бераман. ‘Барселона’ бизга керакли барча нарсани тақдим этмоқда, оилам ва мен бу ерда ўзимизни жуда қулай ҳис қиляпмиз”, дейди Левандовски.

Маълумот учун, полшалик ҳужумчининг “кўк-анорранглилар” билан амалдаги шартномаси жорий йилнинг июнь ойига қадар амал қилади. Левандовски жорий мавсум барча мусобақалар доирасида жами 32 та ўйинда майдонга тушиб, ўз ҳисобига 14 та гол ва битта голли узатма ёздириб қўйган.

Ҳозирда “Барселона” Испания чемпионати турнир жадвалида 67 очко билан пешқадамлик қилмоқда. Иккинчи ўриндаги Мадриднинг “Реал” клуби ҳисобида эса 63 очко мавжуд.