«Манчестер Сити» ярим ҳимоячиси Родри АПЛнинг 24-туридан ўрин олган «Тоттенхэм»га қарши ўйиндан (2:2, 1 февраль) сўнг ҳакамларни оммавий равишда танқид қилгани учун жаримага тортилди.

Ўйиндан сўнг испаниялик футболчи ҳакам Роберт Жонснинг «Тоттенхэм» ҳужумчиси Доминик Соланке томонидан киритилган дастлабки голни инобатга олиш ҳақидаги қарорини кескин танқид қилган эди: «Бу очиқ-ойдин фол эди. «Ман Сити» ҳаддан ташқари кўп ғалаба қозонди ва одамлар бизнинг ютишимизни исташмаяпти, лекин ҳакам холис ишлаши керак». Англия футбол ассоциацияси (FA) Родрига нисбатан «ҳакамнинг холислигига шубҳа билдирувчи ва/ёки унинг ҳалоллигини сўроқ остида қолдирувчи» изоҳлари учун «нотуғри хулқ-атвор» айбловини илгари сурди.

Душанба куни FA Родрини 80 минг фунт стерлинг миқдорида жаримага тортди ва уни огоҳлантирди. Қайд этилишича, суриштирув давомида «Манчестер Сити» ярим ҳимоячиси ўз айбини тан олган.