Ҳужумчи Виктор Осимхен ва вингер Бариш Йилмаз «Галатасарой» таркибидаги энг хавфли ўйинчилар ҳисобланади. Бундай фикр билан «Ливерпуль» бош мураббийи Арне Слот ўртоқлашди.
Чемпионлар лигаси 1/8 финали доирасидаги жамоалар ўртасидаги дастлабки учрашув 10 март куни Истанбулда бўлиб ўтади ва Тошкент вақти билан 22:45 бошланади.
«Осимхен — ажойиб ҳужумчи, у турли усулларда гол уришни билади. Уларда тезкор ва хавфли ўйинчилар кўп — масалан, ўша Йилмаз биринчи бўлимда биздан икки марта осонлик билан қочиб кетганди», — дея мутахассиснинг сўзларини келтиради УЕФА матбуот хизмати.
Жамоалар 2025 йилнинг кузида асосий турнир доирасида аллақачон ўзаро тўқнаш келишган. Ўшанда ғалаба Туркия клубига насиб этган эди (1:0).
