Техник ҳакамлар қўмитаси (ТҲҚ) Ла Лиганинг 26-турида рақибининг юзига ургани учун Антонио Рюдигер майдондан четлатилиши кераклигини эълон қилди.

26-дақиқада "Хетафе" ҳимоячиси Диего Рико тўп билан ён томонда ҳаракатланаётганда Арда Гюлер билан тўқнашувда йиқилди. Ҳодисага кейинроқ қўшилган Рюдигер йиқилиб, чап тиззаси билан рақибининг елкасига, кейин эса чап тиззаси билан жағига урилди. Ҳакам Алехандро Муньис шифокорларни майдонга чақирди, аммо қоидабузарликни қайд этмади.

"ТҲҚ буни жиддий қоидабузарлик деб ҳисоблади, чунки "Реал Мадрид" футболчиси тўпни олишга қодир бўлмаган ҳолда ерда ётган рақибига тиззаси билан ташланди. Бу ҳодиса ҳакам томонидан сезилмагани ва аниқ ва равшан хато бўлгани учун, ВАР ўйинчини жиддий қоидабузарлик учун қизил карточка билан жазолаш мақсадида мониторда ҳодисани кўриб чиқишни тавсия қилиши керак эди", деб тушунтирди қўмита.