Мадриднинг "Атлетико" клуби ҳужумчиси Хулиан Альварес ўз жамоасига Чемпионлар лигаси 1/8 финалининг илк учрашувида "Тоттенхэм"ни тор-мор этишда (5:2) ёрдам берди.
Аргентиналик футболчи 6-дақиқада Маркос Льорентега голли узатма етказиб берди, 14 ва 55-дақиқаларда эса ўз ҳисобига гол ёздириб қўйди. Шу тариқа, 26 ёшли ҳужумчининг Чемпионлар лигасининг жорий мавсумидаги самарали ҳаракатлари сони ўнтага етди (7 та гол ва 3 та ассист). "Матрасчилар" ҳужум чизиғи етакчиси турнирда ўн ва ундан ортиқ голда иштирок этган учинчи футболчига айланди. Бу борада у Мадриднинг "Реал" клуби аъзоси Килиан Мбаппе (13+1) ва "Ньюкасл" вакили Энтони Гордондан (10+2) кейинги ўринда бормоқда.
18 март куни Лондонда "Атлетико" ва "Тоттенхэм" ўртасидаги жавоб учрашуви бўлиб ўтади.
