«Бавария» бош мураббийи Венсан Компани вингер Майкл Олисе ҳақидаги фикрлари билан ўртоқлашди.

24 ёшли француз Чемпионлар лигаси 1/8 финали доирасида «Аталанта»га қарши кечган баҳс қаҳрамонига айланди. У ўз ҳисобига иккита гол ва битта голли узатмани ёздириб қўйди. Учрашув мюнхенликларнинг 6:1 ҳисобидаги ғалабаси билан якунланди.

«Ишга бўлган бундай муносабат билан Олиседа дунёнинг энг яхши ўйинчиларидан бири бўлиш учун барча имкониятлар мавжуд. У деталларга жуда эътиборли. Мен футболчиларни ўзаро солиштиришни ёқтирмайман, лекин ўз вақтида Кевин де Брюйне билан бирга ўйнаганман ва унинг ёш футболчидан қандай қилиб суперюлдузга айланганини ўз кўзларим билан кўрганман. У деталларга берилган эди ва Майклда ҳам худди шу хусусият бор. Албатта, бунда тўхтаб қолмаслик керак, биз уни янада ривожланишга ундашимиз лозим, лекин у шубҳасиз тўғри йўлда», — дея Компанининг сўзларидан иқтибос келтиради Bayern & Germany.

Майкл Олисе 2024 йилнинг ёзида «Кристал Пэлас»дан «Бавария»га ўтган эди.