Мадриднинг «Атлетико» клуби ҳужумчиси Антуан Гризманн шу ойда МЛСга йўл олиши мумкинлиги ҳақидаги гап-сўзларга нуқта қўйди.
Франциялик футболчига «Орландо Сити» даъвогарлик қилмоқда. Миш-мишларга кўра, Америка клуби МЛСда трансфер ойнаси очиқлигидан фойдаланиб, март ойидаёқ ўйинчини ўз томонига оғдириб олмоқчи бўлган. Эндиликда 34 ёшли футболчининг ўзи камида мавсум якунига қадар «матрасчилар» сафида қолишини тасдиқлади.
«Мен бу ерда бахтлиман ва ўйиндан завқ оляпман. Мақсадим — «Атлетико» билан Чемпионлар лигаси финалига чиқиш ва Испания кубогида ғолиб чиқиш. Менинг орзуим айнан шу», — деди форвард «Тоттенхэм» устидан қозонилган ғалабадан (5:2) сўнг берган интервьюсида.
Антуан Гризманнинг Мадрид клуби билан шартномаси 2027 йилнинг ўрталарига қадар мўлжалланган.
