"Ливерпуль" ўз марказий ҳимоячисини жамоада сақлаб қолиш борасида қатъий қарорга келган. CaughtOffside нашри хабарига кўра, Ибраима Конате мерсисайдликлардан анча фойдали шартнома бўйича таклиф олган. "Қизиллар" трансфер бозоридаги узоқ давом этадиган "сериаллар"дан қочиш учун футболчидан имкон қадар тезроқ аниқ жавоб олишни истамоқдалар.
Қайд этилишича, 26 ёшли Конатенинг вазиятини "Реал" Мадрид, "ПСЖ" ва "Интер" клублари диққат билан кузатиб боришмоқда. Улар ёзда бундай юқори даражадаги футболчини эркин агент сифатида ўз сафига қўшиб олиш имконияти пайдо бўлиши мумкинлигини тушуниб туришибди.
Конате "Ливерпуль"даги бешинчи мавсумини ўтказмоқда. Француз ҳимоячиси "қизиллар" либосида жами 171 та ўйинда майдонга тушиб, 7 та гол ва 4 та голли узатмани ўз ҳисобига ёздириб қўйган.
