«Манчестер Сити» Чемпионлар лигаси 1/8 финали доирасида «Сантьяго Бернабеу» стадионида кечган баҳсда Мадриднинг «Реал» клубига йирик ҳисобда (0:3) имкониятни бой берди.

Учрашув тақдирини «қаймоқранглилар» ярим ҳимоячиси Федерико Вальверде томонидан қайд этилган хет-трик ҳал қилди. Opta маълумотларига кўра, бу Хосеп Гвардиола жамоалари учун Чемпионлар лигаси плей-офф босқичининг илк ўйинларидаги энг йирик мағлубият бўлди. Бунгача мураббий яна икки бор шундай натижа қайд этган: 2017/18 йилги мавсумда «Ливерпуль»дан (чорак финалда 0:3) ва 2014/15 йилги мавсумда «Барселона»дан (ярим финалда 0:3) мағлуб бўлган. Сўнгги ҳолат испаниялик мутахассис «Бавария»да ишлаётган даврга тўғри келган эди.

Хосеп Гвардиола 2016 йилнинг ёзида «Манчестер Сити» бошқарувини қўлга олган. Унинг Премьер-лига гранди билан амалдаги шартномаси 2027 йилнинг ўрталарига қадар мўлжалланган.