Чемпионлар лигаси 1/8 финалининг дастлабки учрашувида «Челси» сафарда «ПСЖ»га 2:5 ҳисобида имкониятни бой берди. Бироқ ўйин бошланишидан саккиз соат олдин Лондон жамоасининг бошланғич таркиби матбуотга сизиб чиққани натижадан ҳам кўпроқ муҳокамаларга сабаб бўлмоқда. Энди «аристократлар» қароргоҳида ушбу ҳолат бўйича ички суриштирув ўтказилади.
«Таркибнинг сизиб чиқиши? Мен бу ҳақда билмас эдим. Ишончим комилки, биз бу масалага ойдинлик киритамиз ва ҳаммасини ҳал қиламиз», — деди журналистларга «Челси» бош мураббийи Лиам Росеньор.
«Челси» навбатдаги ўйинини шанба куни, 14 мартда Премьер-лига доирасида ўз майдонида «Ньюкасл»га қарши ўтказади. Орадан яна уч кун ўтиб, 17 мартда Росениор шогирдлари Чемпионлар лигаси жавоб баҳсида «ПСЖ»ни қабул қилишади. Учта тўп фарқини йўққа чиқариш ва вазиятни ўнглаш жамоа учун жуда қийин вазифа бўлиши кутилмоқда.
