УЕФА "ПСЖ"га қарши ўйинда болбой (тўп узатувчи бола) билан содир бўлган воқеа туфайли "Челси" ярим ҳимоячиси Педру Нетуга нисбатан санкциялар қўллаши мумкин.
Чемпионлар лигаси 1/8 финалининг илк учрашувида "кўклар" сафарда "ПСЖ"га имкониятни бой беришди (2:5). Баҳс давомида парижликлар бош мураббийи Луис Энрике "Парк де Пренс"даги болбойга тўпни рақибга бермасликни буюрган. Шундан сўнг Нету болага яқинлашиб, уни итариб юборган ва тўпни тортиб олган, натижада болбой майдонга йиқилган.
Ўйиндан сўнг футболчи болакайдан узр сўраганини ва унга ўз футболкасини совға қилганини маълум қилди.
"Челси" футболчиси Педру Нетуга нисбатан УЕФА Интизом регламентининг 15(1)(а)(v) моддасига мувофиқ, спортга зид хулқ-атвор учун интизом иши қўзғатилди. УЕФА интизом органлари ушбу иш бўйича белгиланган тартибда қарор қабул қилади", – деб хабар берди журналист Низаар Кинселла УЕФАга таяниб.
