Лондоннинг «Арсенал» клуби ярим ҳимоячиси Мартин Эдегор Мадриднинг «Реал» клуби қизиқишлари доирасига тушди. «Тўпчилар» сардорининг ўйинида пасайиш кузатилаётгани ва клуб фойда кўриш мақсадида қимматбаҳо ўйинчиларидан бирини сотишни режалаштираётгани ҳақидаги хабарлар фонида, унинг жамоадан кетиши борасидаги гап-сўзлар тинмаяпти.

Football Transfers нашрининг хабарига кўра, илгари мадридликлар сафида тўп сурган 27 ёшли футболчини сотиб олишга «Реал» қизиқиш билдирмоқда. Шунга қарамай, «Арсенал»га яқин манбалар хавбек билан хайрлашиш борасидаги фаразларни рад этишмоқда. Эдегорнинг ўзи ҳам жамоадан кетиш иштиёқида эмас ва келажагини Лондон клуби билан боғлашга тайёр.

Transfermarkt портали баҳосига кўра, футболчининг нархи 60 млн еврони ташкил этади.