Лондоннинг "Арсенал" клуби ярим ҳимоячи Деклан Райс борасида бир қарорга келди. "Тўпчилар" футболчини жамоада сақлаб қолмоқчи ва у билан янги шартнома бўйича музокараларни бошлаб юборишди. Бу ҳақда BBC сайти хабар бермоқда.

"Арсенал"нинг Райс учун тайёрлаган таклифи иш ҳақини оширишни ўз ичига олади. Агар меҳнат келишуви имзоланса, ярим ҳимоячи жамоанинг энг юқори ҳақ тўланувчи футболчиларидан бири сифатидаги мақомини мустаҳкамлайди. Қайд этилишича, музокаралар айни дамда дастлабки босқичда.

27 ёшли Райснинг амалдаги шартномаси 2028 йилнинг ўрталаригача мўлжалланган бўлиб, унда келишувни яна бир мавсумга узайтириш имконияти ҳам мавжуд. Деклан Райс "Арсенал" сафида жами 144 та ўйин ўтказди. Ушбу баҳсларда ярим ҳимоячи 20 та гол урди ва шерикларига 31 та голли узатмани амалга оширди.