"Реал" ҳужумчиси Килиан Мбаппе ижтимоий тармоқларда янги пост қолдирди. Француз футболчиси бир қатор суратларни эълон қилди. Уларнинг баъзиларида у жамоани трибунада қўллаб-қувватлаётгани, майдонда ёки тренажёр залида машғулот ўтказаётгани акс этган. Ҳатто таом солинган стол ва Эйфель минорасининг сурати ҳам бор. Мбаппе ушбу суратлар остига "Батарея қувватланди" деган икки оғиз сўзни ёзиб қолдирди.
Килиан Мбаппе тиззасидаги муаммо туфайли "Реал"нинг сўнгги ўйинларини ўтказиб юборган эди. Ҳужумчи ҳатто мутахассис кўригидан ўтиш учун Парижга ҳам бориб келди. Аввалроқ "Реал" бош мураббийи Альваро Арбелоа Мбаппенинг "Эльче"га қарши (14 март) ўйнамаслигини, аммо "Манчестер Сити" билан баҳсда (17 март) майдонга тушиш имконияти борлигини айтган эди.
