«Ювентус» ҳужумчиси Душан Влахович келаётган ёзда «Барселона»га ўтмайди.

«Кўк-анорранглилар» сербиялик футболчини эркин агент сифатида ўз сафларига қўшиб олиш имкониятини кўриб чиқаётган эди, бироқ сўнгги вақтда вазият ўзгарди. La Gazzetta dello Sport нашрининг хабарига кўра, Каталония клуби 26 ёшли футболчи номзодидан воз кечишга қарор қилган. Катта эҳтимол билан, ҳужумчи ҳеч қаерга кетмайди — у «Ювентус» билан шартномасини узайтиришга яқин турибди.

Душан Влахович Роберт Левандовскининг вориси бўлиши мумкин бўлган номзодлардан бири сифатида кўрилаётган эди. Польякнинг «Барса» билан амалдаги келишуви ҳам шу ёзда ниҳоясига етади.