«Ливерпуль» ўтган йилнинг ёзида клубга келиб қўшилган Флориан Вирцга катта умидларни боғламоқда. «Қизиллар» футболчи учун «Байер»га 125 миллион евро тўлашган эди, бироқ у Англияда дарҳол ўз ўрнини топиб кета олмади. TEAMtalk маълумотларига кўра, «Ливерпуль»нинг юқори мартабали раҳбарлари Вирцда нафақат жамоанинг кўп йиллик етакчисини, балки келажакда «Олтин тўп» учун кураша оладиган дунёнинг энг яхши футболчиларидан бирини кўришмоқда.

Флориан Вирцнинг мерсисайдликлар билан шартномаси 2030 йилгача мўлжалланган. Арне Слот жамоасининг жорий мавсумдаги 37 та ўйинида 22 ёшли ҳужумкор ярим ҳимоячи олтита гол урди ва саккизта голли узатмани амалга оширди.