«Барселона» якшанба куни ўз майдонида «Севилья»га қарши ўйин ўтказади. Учрашув каталония клуби президенти сайлови кунига тўғри келмоқда — ушбу лавозимга Жоан Лапорта ва Виктор Фонт номзод сифатида кўрсатилган. «Кўк-анорранглилар» бош мураббийи Ханс-Дитер Флик ўйиннинг сайлов кунида ўтказилиши бирор-бир тарзда таъсир қилиши мумкинми, деган саволга жавоб берди.

«Биз 100 фоиз эътиборимизни ўйинга қаратганмиз. Мақсадимиз — олдинда турган барча учта уй учрашувида ғалаба қозониш. Биз «Севилья»нинг кучли томонларини биламиз. Улар бизни аввал мағлуб этишган, улар юқори прессинг ишлатишади. Аммо биз ғалаба қозонишни истаймиз», — деди Флик матбуот анжуманида.

«Барселона» ва «Севилья» жамоалари 15 март куни Тошкент вақти билан соат 20:15 да ўйинни бошлашади.