«Ливерпуль» ярим ҳимоячиси Доминик Собослаи Англия Премьер-лигасида клуб учун урилган голлар сони бўйича Хаби Алонсога етиб олди.
Венгриялик футболчи якшанба куни «Тоттенхэм»га қарши кечган баҳсда гол муаллифига айланди, бироқ бу унинг жамоасига ғалаба қозониш учун ёрдам бермади (1:1). 25 ёшли ярим ҳимоячининг ҳисобида энди Англия чемпионатининг 97 та учрашувида «қизиллар» учун киритилган 14 та гол мавжуд. Мерсисайдликлар сафида 2004 йилдан 2009 йилгача тўп тепган машҳур испаниялик Хаби Алонсо ҳам лигада айнан шунча гол урган эди.
Доминик Собослаи «Ливерпуль»га 2023 йилда Германиянинг «РБ Лейпциг» клубидан ўтган эди. АПЛнинг жорий мавсумида футболчи 28 та ўйинда майдонга тушиб, рақиблар дарвозасини беш бор ишғол қилди.
