«ПСЖ» жамоаси Чемпионлар Лигаси 1/8 финалининг дастлабки учрашувида «Челси»ни 5:2 ҳисобида мағлуб этиб, ишининг фақат ярмини бажарди.

Жавоб баҳси алоҳида аҳамиятга эга бўлади, чунки лондонликларнинг йўқотадиган нарсаси йўқ. Бу ҳақда парижликлар бош мураббийи Луис Энрике ўйин олдидан ўтказилган матбуот анжуманида айтиб ўтди.

«Иккинчи ўйин доимо фарқ қилади, чунки жамоалардан бири турнирдан чиқиб кетиш хавфи остида бўлади ва бу вазиятни ўзгартиришга ҳаракат қилади. Бироқ биз бундай ўйинларга ўрганганмиз ва тайёр бўламиз», — дея таъкидлади мутахассис. Унинг сўзларидан UEFA матбуот хизмати иқтибос келтирмоқда.

Шунингдек, у биринчи учрашувда кучлар узоқ вақт давомида тенг келганини ва фақат ўйин якунида «ПСЖ» рақибни таслим эта олганини қайд этди.