«PSJ» jamoasi Chempionlar Ligasi 1/8 finalining dastlabki uchrashuvida «Chelsi»ni 5:2 hisobida mag‘lub etib, ishining faqat yarmini bajardi.
Javob bahsi alohida ahamiyatga ega bo‘ladi, chunki londonliklarning yo‘qotadigan narsasi yo‘q. Bu haqda parijliklar bosh murabbiyi Luis Enrike o‘yin oldidan o‘tkazilgan matbuot anjumanida aytib o‘tdi.
«Ikkinchi o‘yin doimo farq qiladi, chunki jamoalardan biri turnirdan chiqib ketish xavfi ostida bo‘ladi va bu vaziyatni o‘zgartirishga harakat qiladi. Biroq biz bunday o‘yinlarga o‘rganganmiz va tayyor bo‘lamiz», — deya ta’kidladi mutaxassis. Uning so‘zlaridan UEFA matbuot xizmati iqtibos keltirmoqda.
Shuningdek, u birinchi uchrashuvda kuchlar uzoq vaqt davomida teng kelganini va faqat o‘yin yakunida «PSJ» raqibni taslim eta olganini qayd etdi.
