«Арсенал»нинг собиқ ҳужумчиси Александр Ляказетт «тўпчилар»нинг ўйин услубига нисбатан айтилаётган танқидларга ўз муносабатини билдирди.

«Бир гап айтсам майлими? Яқинда «Арсенал»нинг иккита ўйинини кузатдим — дам олиш кунлари «Эвертон»га қарши ва ўз уйларида «Байер» билан кечган баҳсни. Бу жамоа жуда юқори даражада ўйин кўрсатмоқда. Ҳимоядаги тартибга, ўйин суръатига (интенсивлигига), ҳужумдаги тажовузкорлик ва ярим ҳимоядаги кучга эътибор беринг — улар майдоннинг ҳар бир чизиғида ишончли кўринишмоқда. Агар улар шу услубда ўйнашда давом этишса, бу мавсумда барча имкони бўлган совринларни ютиш учун реал имкониятга эга бўлишади. Уларнинг ўйинини томоша қилиш менга завқ бағишлайди», — деди Ляказетт.

Айни дамда «Арсенал» 70 очко жамғарган ҳолда Англия чемпионати турнир жадвалида пешқадамлик қилмоқда. «Тўпчилар» иккинчи ўринда бораётган «Манчестер Сити»ни тўққиз очкога ортда қолдирмоқда, бироқ «шаҳарликлар» ихтиёрида битта захира ўйини мавжуд.