Мадриднинг «Атлетико» клуби бош мураббийи Диего Симеоне жамоасининг сўнгги 13 йил ичида саккизинчи бор Чемпионлар лигаси чорак финалига йўл олгани ҳақида фикр билдирди. Аргентиналик мутахассис «матрасчилар»ни 2011 йилнинг декабридан бери бошқариб келмоқда.
— Баъзида ҳеч нарса дейиш шарт эмас, рақамларнинг ўзи ҳаммасини айтиб турибди, — дея Симеоненинг сўзларидан иқтибос келтирмоқда журналист Фабрицио Романо.
18 март куни «Атлетико» Чемпионлар лигаси 1/8 финал жавоб учрашувида сафарда «Тоттенхэм»га 2:3 ҳисобида имкониятни бой берди. Шунга қарамай, Симеоне шогирдлари биринчи ўйинда 5:2 ҳисобида йирик ғалабага эришганлари сабабли чорак финал йўлланмасини қўлга киритдилар.
Чемпионлар лигасининг навбатдаги босқичида «Атлетико»га «Барселона» рақиблик қилади. Ушбу учрашувлар апрель ойида бўлиб ўтади.
