Madridning «Atletiko» klubi bosh murabbiyi Diyego Simeone jamoasining so‘nggi 13 yil ichida sakkizinchi bor Chempionlar ligasi chorak finaliga yo‘l olgani haqida fikr bildirdi. Argentinalik mutaxassis «matraschilar»ni 2011 yilning dekabridan beri boshqarib kelmoqda.
— Ba’zida hech narsa deyish shart emas, raqamlarning o‘zi hammasini aytib turibdi, — deya Simeonening so‘zlaridan iqtibos keltirmoqda jurnalist Fabrisio Romano.
18 mart kuni «Atletiko» Chempionlar ligasi 1/8 final javob uchrashuvida safarda «Tottenxem»ga 2:3 hisobida imkoniyatni boy berdi. Shunga qaramay, Simeone shogirdlari birinchi o‘yinda 5:2 hisobida yirik g‘alabaga erishganlari sababli chorak final yo‘llanmasini qo‘lga kiritdilar.
Chempionlar ligasining navbatdagi bosqichida «Atletiko»ga «Barselona» raqiblik qiladi. Ushbu uchrashuvlar aprel oyida bo‘lib o‘tadi.
