Италиянинг «Комо» клуби ўз хўжайинларидан бири — Майкл Бамбанг Хартононинг вафоти ҳақида хабар берди.
Ака-ука Роберт Буди ва Майкл Бамбанг Хартоно 2019 йилдан бери ўзларининг Djarum Group компанияси орқали клубга эгалик қилиб келишаётган эди. Улар жамоани Д Сериядан А Сериягача олиб чиқишга муваффақ бўлишди. Айни дамда жамоа турнир жадвалида 4-ўринни эгаллаб, Чемпионлар лигаси йўлланмаси учун курашмоқда.
«Комо» жамоаси Майкл Бамбанг Хартононинг вафотидан чуқур қайғуда. Биз Хартоно оиласига ва Djarum Groupнинг барча ходимларига ҳамдардлик билдирамиз. Ушбу оила бошқаруви остида клуб ўз тарихининг янги саҳифасини очди ва биз Майкл Бамбангни чексиз миннатдорчилик ва ҳурмат билан ёдга оламиз», — дейилади клуб баёнотида.
Forbes нашрининг хабар беришича, Хартоно Сингапурда, 86 ёшида вафот этган. Умумий бойлиги 43,8 миллиард долларни ташкил этувчи ака-ука Хартонолар Индонезиянинг энг бой кишилари ҳисобланишади.
