Чемпионлар лигаси 1/8 финали доирасидаги «Ливерпуль»га қарши кечган сўнгги баҳсда «Галатасарой» қанот ҳужумчиси Ноа Ланг реклама шити (баннери) билан тўқнашув натижасида оғир жароҳат олди — футболчини майдондан замбилда олиб чиқиб кетишди.

Туркия клуби матбуот хизматининг хабар беришича, Ланг ўйиндан сўнг дарҳол шифохонага етказилган ва у ерда футболчининг ўнг қўл бош бармоғи қаттиқ кесилгани ташхиси қўйилган.

Бироқ, туркиялик журналист Мустафа Мандевнинг маълум қилишича, нидерландиялик вингернинг бармоғи реклама шитлари орасида қолиб кетган ва бармоқнинг бир қисми узилиб кетган.

Жорий мавсумда Ноа Ланг барча мусобақаларда жами 38 та ўйинда иштирок этиб, ўз ҳисобига 3 та гол ва 4 та голли узатмани ёздириб қўйган эди.