Ярим ҳимоячи Гави тиззасидаги муаммо туфайли ўтказилган жарроҳлик амалиётидан сўнг узоқ вақт майдонга туша олмади. Яқинда футболчи етти ойлик танаффусдан кейин сафга қайтди ва учрашувларнинг бирида иштирок этди — Гави «Севилья»га қарши ўйинда захирадан майдонга тушиб, 8 дақиқа ва ҳакам томонидан қўшиб берилган вақт давомида ҳаракат қилди.
ESPN хабарига кўра, Гави Испания терма жамоасининг март ойидаги йиғинига чақирув олиши кутилмоқда.
Агар бу маълумот тасдиқланса, «Барселона» бош мураббийи Ханс-Дитер Фликнинг бунга қандай муносабат билдириши қизиқ бўлади. Эҳтимол, германиялик мутахассис бундан мамнун бўлмас, чунки Гави ҳали ўйин ритмига тўлиқ кириб улгурмаган. Аввалроқ Флик Испания миллий терма жамоасида Ламин Ямалдан фойдаланиш тартибидан норозилигини билдирган эди.
