«Болонья» жамоаси Европа лигаси 1/8 финалининг жавоб учрашувида римликларни 4:3 ҳисобида мағлуб этиб, «Рома»ни мусобақадан чиқариб юборди. Шу тариқа, Винченцо Итальяно шогирдлари 21-асрда илк бор Европа турнирининг чорак финалига йўл олди.
Аввалроқ «Болонья» билан бундай ҳолат юз берган, бироқ бу ўтган асрнинг 90-йилларига тўғри келади. Дастлаб, 1990/1991 йилги мавсумда жамоа Австриянинг «Адмира-Ваккер» клубидан ўтган, аммо кейинчалик Лиссабоннинг «Спортинг» жамоасига имкониятни бой берган эди.
Шундан сўнг 1998/1999 йилги мавсум бўлиб ўтган — ўшанда «Болонья» ҳатто ярим финалгача етиб борган, бироқ Франциянинг «Марсель» клубига мағлуб бўлган эди. «Марсель» эса ўз навбатида финалда «Парма» томонидан 0:3 ҳисобида тор-мор этилган.
