Мадриднинг «Реал» клуби бош мураббийи Альваро Арбелоа 33 ёшли ҳимоячи Антонио Рюдигернинг шартномаси борасидаги саволга жавоб берди. Футболчининг амалдаги келишуви шу ёзда ниҳоясига етади.
«Шартнома масалаларига аралашишни ёқтирмайман. Ҳар икки томонни ҳам жуда ҳурмат қиламан. Мен ўз боғимда Рюдигерга ҳайкал қўйишга ҳам тайёрман. Антонио менга март ойида майдонга тушишга тайёр бўлишини айтганди ва шундай бўлди ҳам! Рюдигер — намуна бўла оладиган шахс. Жамоада шундай характерга ва профессионаллик даражасига эга ўйинчи бўлиши мен учун катта шараф. Антонио Рюдигер ҳақида фақат энг илиқ сўзларни айта оламан», — дея Арбелоанинг сўзларидан иқтибос келтирмоқда Sport.es.
Жорий мавсумда Рюдигер барча турнирларда 17 та ўйинда иштирок этиб, битта гол муаллифига айланди. Transfermarkt портали тақдим этган маълумотларга кўра, футболчининг бозор қиймати 9 миллион еврони ташкил этади.
