Madridning «Real» klubi bosh murabbiyi Alvaro Arbeloa 33 yoshli himoyachi Antonio Ryudigerning shartnomasi borasidagi savolga javob berdi. Futbolchining amaldagi kelishuvi shu yozda nihoyasiga yetadi.
«Shartnoma masalalariga aralashishni yoqtirmayman. Har ikki tomonni ham juda hurmat qilaman. Men o‘z bog‘imda Ryudigerga haykal qo‘yishga ham tayyorman. Antonio menga mart oyida maydonga tushishga tayyor bo‘lishini aytgandi va shunday bo‘ldi ham! Ryudiger — namuna bo‘la oladigan shaxs. Jamoada shunday xarakterga va professionallik darajasiga ega o‘yinchi bo‘lishi men uchun katta sharaf. Antonio Ryudiger haqida faqat eng iliq so‘zlarni ayta olaman», — deya Arbeloaning so‘zlaridan iqtibos keltirmoqda Sport.es.
Joriy mavsumda Ryudiger barcha turnirlarda 17 ta o‘yinda ishtirok etib, bitta gol muallifiga aylandi. Transfermarkt portali taqdim etgan ma’lumotlarga ko‘ra, futbolchining bozor qiymati 9 million yevroni tashkil etadi.
