Мадриднинг «Реал» клуби собиқ футболчиси Гути «қаймоқранглилар» бош мураббийи лавозимида фаолият юритаётган Альваро Арбелоанинг иши борасида ўз фикрлари билан ўртоқлашди.
Эслатиб ўтамиз, испаниялик мутахассис жорий йилнинг январь ойида Хаби Алонсонинг ўрнини эгаллаб, «қироллик клуби» бошқарувини ўз қўлига олган эди.
«Реал» мураббийига шунчаки менежер бўлиши керак, деб уни паст баҳолашади, ваҳоланки ғалабалар фақат жамоани бошқариш қобилиятига боғлиқ эмас. Бунинг учун яна ҳамма нарсани тўғри бажариш лозим, худди у қилаётгандек», — дея экспертнинг сўзларини келтирмоқда AS нашри.
Ла Лига турнир жадвалида «Реал» иккинчи ўринда бормоқда ва пешқадам «Барселона»дан тўрт очкога ортда қолмоқда. Чемпионлар лигасида эса Арбелоа жамоаси «Манчестер Сити»ни икки бор мағлуб этиб, 1/4 финалга йўл олишга муваффақ бўлди.
