Килиан Мбаппе яқиндагина тиззасидаги муаммоларни ҳал қилганига қарамай, Франция терма жамоасидан чақирув олди. Жуд Беллингем эса, жароҳатдан тикланиб, 50 кун ичида илк бор якшанба кунги ўйинда майдонга тушиши кутилаётган бўлса-да, Англия терма жамоасига жалб этилди. «Реал» бош мураббийи Альваро Арбелоа матбуот анжуманида бунга ўз муносабатини билдирди.

— Мбаппенинг Франция терма жамоасига чақирилганига қандай қарайсиз?

— Жуда яхши. У тайёр, ўйнашга қодир ва эртага майдонга тушади. Терма жамоаларга қанча кўп ўйинчи чақирилса, шунча яхши. Бу уларнинг даражасидан далолат беради.

— Беллингемнинг Англия терма жамоасига чақирилиши-чи?

— Бу борада ҳам фикрим аввалгидек. У қайдномадан жой олади ва эртага ўйнаши керак.

— Беллингем ва Мбаппе терма жамоаларга бормай, шу ерда машғулот ўташларини истармидингиз?

— Бу менга боғлиқ эмас. Бундай футболчилар терма жамоага бормаслигини кута олмайман. Бу табиий ҳол. Мен ўзим ҳам терма жамоада ўйнаганман ва бу нима эканлигини биламан. Бу — фахр ва масъулият.