«Ливерпуль» бош мураббийи Арне Слот «Брайтон»дан учралган мағлубиятдан (1:2) сўнг жамоасининг Чемпионлар лигаси ҳудудида финиш қилиш имкониятлари ҳақида гапириб ўтди.

Ҳозирда «Ливерпуль» Премьер-лига турнир жадвалида бешинчи ўринни эгаллаб турибди. Тур якунларига кўра «Челси» «қизиллар»ни қувиб ўтиши мумкин.

«Ўйин олдидан Чемпионлар лигасига йўлланма олиш учун қолган барча 24 очкони қўлга киритишимиз шарт бўлмаса керак, деб ҳисоблагандим. Умид қиламанки, бу борада ҳақман, чунки энди биз максимал 24 очкони жамғара олмаймиз. Афсуски, бугун очко олишнинг иложи бўлмади. Иккинчи бўлимда "Брайтон" учинчи голни уришга биз иккинчи голни уришимиздан кўра яқинроқ эди», — деди Слот TNT Sports телеканалига.

Мавсум якунига қадар «Ливерпуль» АПЛ доирасида «Фулхэм», «Эвертон», «Кристал Пэлас», «Манчестер Юнайтед», «Челси», «Астон Вилла» ва «Брентфорд» жамоаларига қарши майдонга тушади.