Дортмунднинг «Боруссия» клуби ва Себастьян Кель ўзаро келишувга асосан ҳамкорликни тўхтатишди. Ушбу қарор шу якшанба куни «Боруссия» раҳбарияти ва собиқ спорт директори томонидан бир овоздан қабул қилинди.
«Очиқ мулоқот давомида Себастьян Кель, Карстен Крамер (ижрочи директор) ва мен ёз фасли ўзгаришлар учун энг қулай вақт деган ягона хулосага келдик. Ҳар икки томонга тайёргарлик кўриш учун вақт бериш мақсадида, Себастьян билан шартномани зудлик билан бекор қилишга келишиб олдик», — дея тушунтириш берди клубнинг спорт бўйича бошқарувчи директори Ларс Риккен.
«Кель 2018 йилдан бери «Боруссия»да профессионал футболчилар бўлимини бошқариб келаётган эди, бу вақт ичида клуб 2021 йилда Германия Кубогини қўлга киритди. 2022 йил ёзида дортмундликларнинг собиқ ярим ҳимоячиси спорт директори лавозимини эгаллади ва унинг даврида жамоа 2024 йилги Чемпионлар лигаси финалига қадар етиб борди», — дейилади «Боруссия» расмий сайтида.
