«Фенербахче» ҳужумкор ярим ҳимоячиси Марко Асенсио Испанияга қайтиши мумкин. Журналист Экрем Конурнинг хабар беришича, 30 ёшли футболчига «Севилья», «Вильярреал» ва Мадриднинг «Атлетико» клублари даъвогарлик қилмоқда. Шунингдек, «Реал Сосьедад» ва «Бетис» ҳам вазиятни кузатиб бормоқда. Шунга қарамай, Туркия клуби раҳбарияти футболчини сотишни режалаштирмаяпти.
Марко Асенсио фаолиятининг бошида «Мальорка»да тўп сурган, ўз фаолиятининг энг яхши йилларини эса 2015 йилдан 2023 йилгача шарафини ҳимоя қилган Мадриднинг «Реал» клубида ўтказган. Чемпионлар Лигасининг тўрт карра ғолиби бўлган футболчининг «Фенербахче» билан амалдаги шартномаси 2028 йилгача мўлжалланган. Transfermarkt портали уни 15 миллион еврога баҳоламоқда.













