Мадриднинг «Реал» клуби «Атлетико»га қарши дербини Федерико Вальверде майдондан четлатилгани сабабли бир киши кам бўлиб якунлади. Уругвайлик ярим ҳимоячи 77-дақиқада қўпол ўйини учун тўғридан-тўғри қизил карточка олди. Қолган вақт ичида «қаймоқранглилар» 3:2 ҳисобидаги ғалабани сақлаб қолишга муваффақ бўлишди.
«Реал» клуб телеканали вакиллари, одатдагидек, ҳакамлар қарорига жиддий норозилик билдиришди: «Вальверденинг қизил карточкаси — бу шунчаки шармандалик. Агар «Осасуна»га қарши ўйинда нима бўлганини эсласак, нега бундай қарор қабул қилингани ва нима учун ВАР аралашмагани тушунарли бўлади», — дея RMTV баёнотидан иқтибос келтиради Madrid Xtra.
Вальверде 55-дақиқада «Реал»нинг иккинчи голига муаллифлик қилган эди. «Матрасчилар» дарвозасига йўлланган биринчи ва учинчи тўпларни эса Винисиус Жуниор киритди.
