Мадриднинг «Реал» клуби ярим ҳимоячиси Федерико Вальверде «Атлетико»га қарши кечган дербида ўйин якунига қадар майдонда қола олмади.
27 ёшли футболчи учрашувнинг 77-дақиқасида тўғридан-тўғри қизил карточка олди. Ўша вақтга келиб «қаймоқранглилар» 3:2 ҳисобида олдинда бораётган эди ва қолган дақиқаларда устунликни сақлаб қолиб, ғалабани қўлга киритишди. Қизиғи шундаки, бу Вальверденинг бутун фаолияти давомидаги атиги иккинчи четлатилишидир. Эътиборли жиҳати, унинг биринчи қизил карточкаси ҳам айнан «Атлетико»га қарши кечган баҳсда (2020 йил январь ойидаги Испания Суперкубогида) содир бўлган эди.
Уругвайлик ярим ҳимоячи Ла Лиганинг ушбу якшанба кунги баҳсида «матрасчилар» дарвозасини ишғол қилишга ҳам улгурди. Диего Симеоне жамоаси дарвозасига йўлланган қолган иккита голга эса Винисиус Жуниор муаллифлик қилди.
