Лондоннинг «Арсенал» клуби марказий ҳимоячиси Вильям Салиба Франция терма жамоасининг бўлажак ўйинларини ўтказиб юборади.

24 ёшли футболчи якшанба куни «Манчестер Сити»га қарши кечган ва «канонирлар»нинг 0:2 ҳисобидаги мағлубияти билан якунланган Лига кубоги финалида иштирок этди. Учрашув тугаганидан сўнг, франциялик ҳимоячи тўпиғидан жароҳат олгани ва шу сабабли ўз миллий жамоаси ихтиёрига йўл олмаслиги маълум бўлди. Бу ҳақда журналист Фабрис Хокинс хабар берди. «Арсенал» юлдузининг «учранглилар» таркибидаги ўрнини «Кристал Пэлас» аъзоси, илгари терма жамоада ўйнамаган Максанс Лакруа эгаллайди.

Францияликлар Бразилия (26 март) ва Колумбия (29 март) терма жамоаларига қарши ўртоқлик учрашувларини ўтказишади.