Londonning «Arsenal» klubi markaziy himoyachisi Vilyam Saliba Fransiya terma jamoasining bo‘lajak o‘yinlarini o‘tkazib yuboradi.
24 yoshli futbolchi yakshanba kuni «Manchester Siti»ga qarshi kechgan va «kanonirlar»ning 0:2 hisobidagi mag‘lubiyati bilan yakunlangan Liga kubogi finalida ishtirok etdi. Uchrashuv tugaganidan so‘ng, fransiyalik himoyachi to‘pig‘idan jarohat olgani va shu sababli o‘z milliy jamoasi ixtiyoriga yo‘l olmasligi ma’lum bo‘ldi. Bu haqda jurnalist Fabris Xokins xabar berdi. «Arsenal» yulduzining «uchranglilar» tarkibidagi o‘rnini «Kristal Pelas» a’zosi, ilgari terma jamoada o‘ynamagan Maksans Lakrua egallaydi.
Fransiyaliklar Braziliya (26 mart) va Kolumbiya (29 mart) terma jamoalariga qarshi o‘rtoqlik uchrashuvlarini o‘tkazishadi.
