Уругвайлик ҳимоячи Рональд Араухо «Барселона» учун қийин кечган «Райо Вальекано»га қарши уй учрашувида ғалаба голини киритди. Маълум бўлишича, Араухо кўплаб ўйинларни ўтказиб юборганига қарамай, ушбу голи орқали ўзининг Европадаги бутун фаолияти давомидаги шахсий рекорд кўрсаткичини такрорлади.
Унинг жорий мавсумдаги голлари сони тўрттага етди — «Райо»гача Араухо «Овьедо» ва «Жирона» дарвозасини ишғол қилган, шунингдек, Испания Кубогида «Альбасете»га гол урган эди.
Эслатиб ўтамиз, уругвайлик футболчи 2019 йилдан бери каталонияликлар шарафини ҳимоя қилиб келмоқда. Испания чемпионатининг навбатдаги турида пешқадам «Барселона» Мадриднинг «Атлетико» клубига қарши майдонга тушади.
