«Сантос» ҳужумчиси Неймар дам олиш кунларини онлайн-покер ўйнаш билан ўтказди.
22 март куни «Сантос» «Крузейро»га қарши майдонга тушди (0:0). Неймар ушбу ўйинни ўтказиб юборди — расмий сабаб сифатида «жисмоний юкламаларни тақсимлаш» кўрсатилган.
Portal Leo Dias нашри берган маълумотларга кўра, бразилиялик футболчи бутун дам олиш кунлари давомида онлайн-покер ўйнаган. Жума куни у оиласи билан, шанба куни онлайн-турнирда 7 ярим соат, якшанба куни эса 9 соат давомида ўйин билан банд бўлган. Умумий ҳисобда Неймар ушбу давр ичида онлайн-покерда 24 соатга яқин вақт ўтказган бўлиб, шундан 16 соатдан кўпроғи бевосита турнир баҳсларига тўғри келган. Эътиборли жиҳати шундаки, якшанба куни Неймар айнан «Сантос»нинг ўйини бўлаётган вақтда покер ўйнаган.
Қайд этилишича, Неймар турнирда қатнашиш учун дастлабки бадал сифатида 5 минг доллардан кўпроқ пул тўлаган, кейинчалик эса «ре-энтри» (ўйиндан чиқиб кетгач, турнирга қайта қўшилиш имконияти) учун 20 минг доллардан ортиқ маблағ сарфлаган. Бу бразилиялик юлдузнинг камида тўрт марта турнирдан чиқиб кетганини англатади.
Душанба куни Неймар онлайн-турнирда иштирок этганини тасдиқлади.
«Ҳа, мен онлайн ўйнадим. Ўз иштирокимдан жуда мамнунман, ҳаммаси жойида. Афсуски, юкламаларни тақсимлаш сабабли ўша кунлари майдонга тушмаганим учун, футболдан ташқари энг ёқтирган машғулотим — покер билан шуғулланишга вақтим бўлди. Мен кундузи ўйнадим», — деди Неймар ўз ижтимоий тармоқларига жойлаштирган видеосида.
