«Santos» hujumchisi Neymar dam olish kunlarini onlayn-poker o‘ynash bilan o‘tkazdi.

22 mart kuni «Santos» «Kruzeyro»ga qarshi maydonga tushdi (0:0). Neymar ushbu o‘yinni o‘tkazib yubordi — rasmiy sabab sifatida «jismoniy yuklamalarni taqsimlash» ko‘rsatilgan.

Portal Leo Dias nashri bergan ma’lumotlarga ko‘ra, braziliyalik futbolchi butun dam olish kunlari davomida onlayn-poker o‘ynagan. Juma kuni u oilasi bilan, shanba kuni onlayn-turnirda 7 yarim soat, yakshanba kuni esa 9 soat davomida o‘yin bilan band bo‘lgan. Umumiy hisobda Neymar ushbu davr ichida onlayn-pokerda 24 soatga yaqin vaqt o‘tkazgan bo‘lib, shundan 16 soatdan ko‘prog‘i bevosita turnir bahslariga to‘g‘ri kelgan. E’tiborli jihati shundaki, yakshanba kuni Neymar aynan «Santos»ning o‘yini bo‘layotgan vaqtda poker o‘ynagan.

Qayd etilishicha, Neymar turnirda qatnashish uchun dastlabki badal sifatida 5 ming dollardan ko‘proq pul to‘lagan, keyinchalik esa «re-entri» (o‘yindan chiqib ketgach, turnirga qayta qo‘shilish imkoniyati) uchun 20 ming dollardan ortiq mablag‘ sarflagan. Bu braziliyalik yulduzning kamida to‘rt marta turnirdan chiqib ketganini anglatadi.

Dushanba kuni Neymar onlayn-turnirda ishtirok etganini tasdiqladi.

«Ha, men onlayn o‘ynadim. O‘z ishtirokimdan juda mamnunman, hammasi joyida. Afsuski, yuklamalarni taqsimlash sababli o‘sha kunlari maydonga tushmaganim uchun, futboldan tashqari eng yoqtirgan mashg‘ulotim — poker bilan shug‘ullanishga vaqtim bo‘ldi. Men kunduzi o‘ynadim», — dedi Neymar o‘z ijtimoiy tarmoqlariga joylashtirgan videosida.