Испаниянинг «Севилья» клуби истеъфога чиқарилган мутахассис Матиас Альмейда ўрнига тезкорлик билан ўринбосар топди. Жамоа расмий сайтининг хабар беришича, маҳаллий мутахассис Луис Гарсия Пласа клубнинг янги бош мураббийи этиб тайинланди.

Пласа билан 2027 йилгача мўлжалланган шартнома имзоланди. Мураббийнинг мавсум қолган қисмидаги асосий вазифаси — «Севилья»нинг Ла Лигадаги ўрнини сақлаб қолишдан иборат.

Илгари Пласа «Вильярреал» ва унинг ўринбосарлар жамоасида ишлаган, «Леванте», «Мальорка» ҳамда «Алавес» жамоаларини Примерага олиб чиққан, шунингдек, хорижда (Хитой ва Саудия Арабистонида) ҳам ўз кучини синаб кўрган. 2025 йилнинг кузида у Москванинг «Спартак» клубига бош мураббийлик учун номзод сифатида кўриб чиқилган эди.

29 тур якунларига кўра, «Севилья» 31 очко билан 15-ўринда бормоқда. Хавфли ҳудуд (қуйи лигага тушиб кетиш зонаси) эса жамоадан 3 очко пастда жойлашган.