Ярим ҳимоячи Бернарду Силва жорий мавсум якунланганидан кейин катта эҳтимол билан «Манчестер Сити»ни тарк этади.

Defensacentral нашрининг хабарига кўра, португалиялик футболчи ўз хизматларини нафақат аввалроқ хабар берилган «Барселона»га, балки «Реал Мадрид»га ҳам таклиф қилган. Мадрид клуби ярим ҳимоячи номзодини кўриб чиқишга унчалик иштиёқ билдирмаяпти, «кўк-анорранглилар» эса ҳозирча хавбек билан шартнома имзолаш вариантини инкор этишмаяпти.

Бернарду Силва 2017 йилда «Монако»дан «Манчестер Сити»га 50 миллион евро эвазига ўтган эди. Жорий мавсумда португалиялик футболчи «шаҳарликлар» сафида барча турнирларда 42 та ўйинда майдонга тушиб, 3 та гол урди ва 5 та голли узатмани амалга оширди.