Африка миллатлар кубоги–2025 финали атрофидаги можаро янги босқичга чиқди. Сенегал футбол федерацияси Спорт арбитраж судига расмий апелляция топширди.

Маълум қилинишича, сенегалликлар Африка футбол конфедерацияси қарорига норозилик билдирмоқда. Ушбу қарорга кўра, Сенегал терма жамоаси финалдаги ғалабадан маҳрум этилган ва техник мағлубият ёзилган эди.

Эслатиб ўтамиз, финал баҳси 2026 йил 18 январь куни Рабат шаҳрида Сенегал ва Марокаш терма жамоалари ўртасида ўтганди. Асосий вақт охирида сенегаллик футболчилар ўз дарвозасига белгиланган пенальтига норозилик сифатида майдонни тарк этган. Тахминан 15 дақиқалик танаффусдан сўнг улар майдонга қайтишган ва Браим Диас ижро этган пенальтини Эдуар Менди қайтарган.

Қўшимча вақтда эса Папе Гуйе томонидан урилган гол Сенегалга ғалаба келтирганди. Бироқ 18 март куни Марокаш футбол федерацияси апелляцияси қаноатлантирилиб, натижа бекор қилинди ва Марокаш ғолиб деб эълон қилинди.

25 март куни Спорт арбитраж суди томонидан рўйхатга олинган янги апелляцияда Сенегал томони CAF қарорини бекор қилиш ва ўзларини турнир ғолиби сифатида тан олишни талаб қилмоқда. Ҳозирча ишни кўриб чиқиш санаси белгиланмаган.