«Реал» ярим ҳимоячиси Федерико Вальверденинг майдондан четлатилиши бўйича берилган апелляция рад этилди. Уругвайлик хавбек Ла Лиганинг якшанба куни бўлиб ўтган ўйинида «Атлетико» футболчиси Алекс Баэнага нисбатан қўпол фол ишлатгани учун тўғридан-тўғри қизил карточка олган эди.

Ҳакамлар техник қўмитаси (CTA) Испания Қироллик футбол федерацияси (RFEF)га бош ҳакам Хосе Луис Мунуэра Монтеронинг қарори тўғри бўлганини маълум қилди. Шундан сўнг Вальверденинг жазоси масаласи Интизом қўмитасида кўриб чиқиш учун юборилди. «Реал» апелляция бериб, футболчи тўпга ўйнашга урингани, аммо мўлжални нотўғри олганини таъкидлади. Бироқ Интизом қўмитаси бу фикрга қўшилмади ва Мунуэра Монтеронинг қарорини қўллаб-қувватлади.

Diario AS хабарига кўра, Вальверде бир ўйинга дисквалификация қилинди. Агар унинг ҳаракати жиддий қоидабузарлик сифатида баҳоланганида, у икки ўйинга четлатилиши мумкин эди.

Ушбу қарорга кўра, Вальверде халқаро танаффусдан кейин «Реал»нинг илк ўйини — «Мальорка»га қарши сафар баҳсини ўтказиб юборади.