Швеция терма жамоаси бош мураббийи Грэм Поттер Жаҳон чемпионати йўлланмаси учун ўтиш ўйини (плей-офф) ярим финали олдидан баъзи футболчиларнинг ҳолати юзасидан хавотир билдирди. Швецияликларнинг рақиби Украина бўлади, учрашув 26 март куни Тошкент вақти билан тунги соат 00:45 да бошланади.
«Виллиот Сведберг ва Густав Лундгрен билан нима бўлишини кутишимиз керак. Асосий масала шундаки, Лундгрен етарлича машғулот ўтказдими ва майдонга туша оладими?» — дея Поттернинг сўзларини келтиради УЕФА расмий сайти.
Ҳозирда Швеция ФИФА рейтингида 42-ўринни, Украина эса 30-ўринни эгаллаб турибди.
