«Барселона»нинг ҳужумкор ярим ҳимоячиси Фермин Лопес жамоасининг жорий йилги Чемпионлар лигасидаги имкониятлари ҳақида ўз фикрларини билдирди.
Каталонияликлар чорак финалга йўл олишган ва у ерда Мадриднинг «Атлетико» жамоасига қарши майдонга тушишади. «Матрасчилар» билан ўйинлар 8 ва 14 апрель кунлари бўлиб ўтади.
«Фаворитлар йўқ. Ҳозирда биз Ла Лигада бўлгани каби Чемпионлар лигасида ҳам яхши иштирок этяпмиз. Даъвогарлар жуда кўп, лекин умид қиламанки, якунда «Барселона» ғолиб чиқади», — дея Ферминнинг сўзларини келтиради Испания ОАВлари.
Энг нуфузли еврокубокнинг ўтган мавсумида «кўк-анорранглилар» ярим финалгача етиб боришган ва икки ўйин натижасига кўра 6:7 ҳисобида Миланнинг «Интер» жамоасига имкониятни бой беришган эди.
