«Интер Майами» ҳужумчиси Луис Суарес «Барселона»нинг жорий мавсумдаги иштироки ҳақидаги фикрлари билан ўртоқлашди.

Яқинда Ханс-Дитер Флик жамоаси жавоб учрашувида «Ньюкасл»ни 7:2 ҳисобида мағлуб этиб, Чемпионлар лигасининг 1/4 финалига йўл олди. Ла Лигада эса «кўк-анорранглилар» 29-турдан сўнг Мадриднинг «Реал» клубини тўрт очкога ортда қолдириб, биринчи ўринни эгаллаб турибди.

«Барселона» жуда яхши ўйин кўрсатмоқда. «Ньюкасл» устидан қозонилган ғалаба жамоа руҳиятини кўтариш учун жиддий туртки бўлди. Ҳозирги вақтда жамоа ҳам чемпионатда, ҳам Чемпионлар лигасида ажойиб кўринмоқда», — дея Суареснинг сўзларини келтиради Barca Universal.

Уругвайлик футболчи 2014 йилдан 2020 йилгача Каталония гранди шарафини ҳимоя қилган.

Чемпионлар лигасининг чорак финалида «Барса» Суарес тўп суришга улгурган яна бир жамоа — «Атлетико» билан тўқнаш келади.