Аргентина терма жамоаси устози Лионель Скалони бўлажак ўртоқлик учрашувида Лионель Мессини майдонга тушириш режалари ҳақида тўхталди.

Жумадан шанбага ўтар кечаси аргентиналиклар Мавританияга қарши баҳс олиб боришади. Учрашув Тошкент вақти билан соат 04:15 да бошланади.

«Биз аввалги даражамизга қайтишни ва барча футболчиларимизни ҳаракатда кўришни истаймиз. Мессига келсак — ҳа, у ўйнайди. Бу барча учун у биз билан бўлган вақтда унинг ўйинидан завқланиш учун яна бир имкониятдир», — деди Скалони матбуот анжуманида.

Чоршанба куни, 1 апрель санасида «альбиселесте» иштирокидаги иккинчи ўртоқлик учрашуви бўлиб ўтади — бу сафар рақиб Замбия терма жамоаси бўлади.