Шу ёзда АҚШ, Канада ва Мексика яшил майдонларида Жаҳон чемпионати баҳслари бўлиб ўтади. Украина терма жамоаси плей-оффнинг ҳал қилувчи баҳсида Швецияга 1:3 ҳисобида имкониятни бой бергач, Мустақил Давлатлар Ҳамдўстлигидан фақатгина бир жамоа мундиалда иштирок этиши ойдинлашди.
Гап ўз тарихида илк бор дунёнинг энг йирик футбол форумида қатнашадиган Ўзбекистон миллий терма жамоаси ҳақида кетмоқда.
ЖЧ-2026 гуруҳ босқичида Ўзбекистон терма жамоаси Колумбия ва Португалияга қарши майдонга тушади. Вакилларимизнинг учинчи рақиби ким бўлиши эса бир неча кундан сўнг аниқланади.
Эслатиб ўтамиз, амалдаги Жаҳон чемпиони Аргентина терма жамоаси ҳисобланади.
